Inson kamolotida unga ta’lim bergan, hayot sabogʻi ila kelajak uchun mustahkam poydevor qoʻygan oʻqituvchilarning mehnati beqiyos. Kishi qaysi sohada mehnat qilmasin, uning erishgan har bir yutugʻi, muvaffaqiyati, yuqori natijalari ustozlarning kasbga sadoqati, mas’uliyati samarasidir. Har birimiz uchun ushbu soha vakillari qadrli, ularning mashaqqatli mehnati esa e’tirofga munosib. 

Korxonamizda ham koʻp yillik tajribaga ega, bilimi, shijoati, kimyo sanoati rivojiga qaratilgan intilishi bilan oʻrnak boʻlayotgan ustozlik darajasiga yetgan mutaxassislar koʻp. Yoshligini, bor mehrini sohaga bagʻishlagan kasbdoshlarimizni qadrlaymiz, ishonamiz, tayanamiz va ularga boʻlgan hurmatimiz cheksiz. 

Biz hamisha oʻqituvchilarimiz bildirgan ishonchga munosib boʻlishga intilamiz, ular bizdan faxrlanishlarini istaymiz. Aslida kasb egalari uchun eng katta ragʻbat shogirdlar erishgan ijobiy natijalar boʻlsa ajabmas. 

Bugungi bayram bilan barcha ustozlarimizni muborakbod etaman. Mustahkam sogʻlik, mazmunli hayot, yutuqlar ila unutilmas yorqin faoliyat tilayman. Kasbingizdan faxrlanib mehnat qilish nasib etaversin. 

Kasb bayramingiz muborak boʻlsin!

Farrux Samadov,
“Navoiyazot”AJ boshqaruvi raisi