Previous Next

Konferensiya kun tartibidagi birinchi masalada e’tibor 2024-2026-yillarga mo‘ljallangan jamoa shartnomasining 2025-yilda bajarilishi yakunlariga qaratildi. Bu borada korxona boshqaruvi raisi Farrux Samadov hamda jamiyat kasaba uyushma qo‘mitasi raisi Feruza Fayziyevalarning hisobotlari tinglandi. Asosiy e’tibor mehnat muhofazasi va sanoat xavfsizligiga qaratildi. Korxonadagi ma’nan eskirgan uskunalarni bosqichma-bosqich yangi, zamonaviysiga almashtirishga qaratilgan ishlar olib borilayotgani ta’kidlandi. Shuningdek, joriy yil yakuni bilan kutilayotgan ishlab chiqarish ko‘rsatkichlari, sifat va samaradorlikni oshirishga qaratilgan rejalar xususida ma’lumot berildi. 

2025-yilda jamiyat kasaba uyushma qo‘mitasi tomonidan xodimlarni ijtimoiy qo‘llab-quvvatlash, ularga moddiy yordam ko‘rsatish, sog‘lomlashtirish, rag‘batlantirish borasida amalga oshirilgan ishlar tahlil etildi. Bu jarayonda 2024-yilda qabul qilinib, tasdiqlangan 22 bo‘lim, 441 banddan iborat jamoa shartnomasining bajarilishi yuzasidan ma’lumot berildi. Yakunlangan yilda jamiyat kasaba uyushma qo‘mitasi mablag‘lari hisobidan kimyogarlarga 455 mln. so‘mdan ortiq moddiy yordam ko‘rsatilgani aytib o‘tildi. Bugungi kunda korxona xodimlarining o‘rtacha ish haqqi 7 675 300 so‘mni tashkil etayotgani e’tirof etildi. O‘tkazilgan madaniy-ma’rifiy tadbirlar, ularning samarasi ham e’tibor markazida bo‘ldi. 

Konferensiyada 2026-yilda jamoa shartnomasiga kiritilayotgan o‘zgartirishlar tahlil etildi. Ular yuzasidan muhokamalar o‘tkazilib, takliflar qabul qilindi, xodimlarni qiziqtirgan savollarga javob berildi.  Tadbir yakunida konferensiya kun tartibidagi masalalar yuzasidan qarorlar qabul qilindi.