Kimyoviy mahsulotlar ishlab chiqariladigan korxonalarda mehnat faoliyatini olib boruvchi xodimlar uchun davolash profilaktik ovqatlanish nafaqat sog‘likni muhofaza qilish vositasi, balki ish unumdorligini oshirish, kasalliklarning oldini olish va uzoq muddatli mehnat qobiliyatini ta’minlashning muhim omili hisoblanadi.

“Navoiyazot”AJda mutaxassislarning bu boradagi mehnat huquqlari himoyalangan bo‘lib, ularga oshxonalarda salomatlik uchun foydali bo‘lgan taomlar majmuasi taklif etiladi.

Jamiyat ishchi-xodimlarining sut va sut mahsulotlari, sabzavotli salat, mevalardan tayyorlangan tabiiy sharbatlar, oqsilga boy mahsulotlar, parhezbop taomlarni tanlashi maqsadga muvofiq.  

Korxona xodimlarining yog‘li, qovurilgan ovqatlarni iste’mol qilishi qanday oqibatlarga olib kelishi mumkin?

Kimyoviy moddalar ta’siri ostida ishlaydigan mutaxassislarning bunday taomlanishi jigar va buyrakka ortiqcha yuklama tushishi, oshqozon-ichak kasalliklarining kelib chiqishiga sabab bo‘lishi mumkin. Yog‘li ovqatlar uyquchanlikni oshiradi, charchoq, asabiylikka olib keladi. Bu esa xodimlarning mehnat faoliyatiga salbiy ta’sir etadi. 

Unutmang! To‘g‘ri ovqatlanish zararli moddalarning salbiy ta’sirini kamaytirish, immunitetni mustahkamlash, kasb kasalliklarining oldini olish, ish qobiliyatini yaxshilashga xizmat qiladi.