Previous Next

“Navoiyazot” AJ boshqaruvi raisi Farrux Samadov boshchiligidagi mutasaddilar xizmat safari bilan Xitoyda bo‘lib turishibdi. Mamlakatning Shansi viloyati Tayyuan shahrida joylashgan SEDIN Engineering Co., Ltd. kompaniyasi vakillari bilan bo‘lib o‘tgan uchrashuvda hamkorlikka oid muhim masalalar muhokama etildi.
SEDIN Engineering Co., Ltd. nafaqat Xitoy, balki jahonda ham o‘z nufuziga ega bo‘lgan yirik kompaniya bo‘lib, energetika, neft-gaz, kimyo va boshqa sanoat tarmoqlari uchun muhandislik dizayn, loyihalashtirish, qurilish bo‘yicha to‘liq xizmatlar ko‘rsatadi.
Muloqot davomida hamkorlikda yangi investitsion loyihalarni amalga oshirish samaradorligi, chiqindi gazlar miqdorini kamaytirish, import o‘rnini bosuvchi mahsulotlar ishlab chiqarish hajmini oshirishga qaratilgan quvvatlar bo‘yicha o‘zaro fikr almashildi. 
Jamiyat mutasaddilari Pekinda joylashgan Xitoy Fanlar akademiyasiga qarashli Technical Institute of Physics and Chemistry ilmiy-tadqiqot institutida ham bo‘lishdi. Hamkorlikda izlanishlar olib borish, yanada zamonaviy texnologiyalarni keng joriy etish orqali yangi mahsulotlarni ishlab chiqarish, savdo va eksport imkoniyatlari shuningdek, mutaxassislar malakasini oshirish, mahsulot tayyorlashda energiya sarfini hamda ekologik ta’sirni kamaytirish singari bir qator dolzarb masalalar yuzasidan muzokaralar olib borildi. 
Ushbu hamkorlik korxonaning texnologik yangilanishi, mahsulotlarning sifat va hajm jihatidan o‘sishi, eksport salohiyatining oshishi va yangi ish o‘rinlari tashkil etilishiga ijobiy ta’sir ko‘rsatadi. Bu esa nafaqat jamiyat, balki butun O‘zbekiston kimyo sanoati uchun muhim ahamiyatga ega.