Previous Next

Jamiyat boshqaruvi raisi Farrux Samadov boshchiligida o‘tkazilgan yig‘ilishda rahbar o‘rinbosarlari, ishlab chiqarish majmualari va sex boshliqlari, korxonadagi boshqarma, bo‘lim va xizmatlar rahbarlari ishtirok etdilar. 

Dastlab korxonada yil davomida olib borilgan ishlar muhokama etildi. Mahsulot hajmini oshirish, sifatini yanada yaxshilashga qaratilgan faoliyat samaradorligi tahlil qilindi. Ishlab chiqarish majmualarining belgilangan yillik quvvatga chiqishiga salbiy ta’sir etayotgan omillar  xususida so‘z yuritildi.

Yil davomida sanoat va mehnat xavfsizligini ta’minlash bo‘yicha qilingan ishlar sarhisobiga e’tibor qaratildi. 2024-yilda mehnat muhofazasi va xavfsizlik texnikasi boʻlimi xodimlari tomonidan 153 ta maqsadli, 47 ta navbatdan tashqari, 12 ta majmuaviy tekshiruvlar oʻtkazilganligi, 308 ta qoidabuzarlik holati aniqlanganligi aytib o‘tildi.

Shuningdek, korxonada investitsiya dasturining bajarilishi bo‘yicha olib borilayotgan ishlarga alohida urg‘u berildi. 2030-yilgacha jamiyat negizida ish boshlaydigan 30 dan ortiq yangi loyihalar ahamiyati e’tibor markazida bo‘ldi. Xorijiy investorlarning hamkorlikni mustahkamlash borasida bildirayotgan takliflari o‘rtaga tashlandi. 

Yig‘ilish davomida mas’ullarga majmua va sexlarni modernizatsiya qilish, mavjud quvvatlarni ta’mirlash, zarur uskunalar bilan ta’minlash orqali elektr energiyasi tejamkorligi va mahsulot hajmini oshirishga xizmat qiluvchi loyihalar ustida ishlash vazifasi topshirildi. Shuningdek, korxonadagi transformatsiya jarayonlari haqida ma’lumot berildi. 

Xodim va mutaxassislar malakasini oshirish, mas’uliyatli lavozimlarga kadrlarni tanlash masalasida e’tiborli bo‘lish lozimligi ta’kidlandi.  

Barcha sexlar faoliyati tanqidiy tahlil etildi. Yo‘l qo‘yilgan xato va kamchiliklardan xulosa chiqarish va 2025-yildagi rejani muddatida bajarish bo‘yicha aniq topshiriqlar berildi.