Previous Next

    Samarqand shahri mezbonlik qilayotgan Markaziy Osiyo mamlakatlari va AQSh o‘rtasidagi “C5+1” formatidagi tadbirlar doirasida “O‘zkimyosanoat” AJ va “Navoiyazot” AJ mutasaddilari “KBR, Inc.” kompaniyasi katta vitse-prezidenti Ahmad Aman bilan uchrashdilar. Mintaqaviy siyosiy muloqot, savdo-sotiq, investitsiyalar va xavfsizlik sohalaridagi hamkorlikni mustahkamlashga qaratilgan nufuzli tadbirdagi uchrashuvda kimyo sanoatida o‘zaro manfaatli hamkorlikni kengaytirish, zamonaviy texnologiyalarni joriy etish hamda istiqbolli investitsiya loyihalarini amalga oshirish masalalari muhokama qilindi.

    Uchrashuvda “KBR, Inc.” kompaniyasining xalqaro tajribasi va texnologik salohiyatidan foydalangan holda O‘zbekiston kimyo sanoatining raqobatbardoshligini yanada oshirish, ishlab chiqarish xarajatlarini qisqartirish, mahsulotlar sifatini yaxshilash hamda eksport salohiyatini kengaytirish imkoniyatlari ko‘rib chiqildi. Xususan, “Navoiyazot” AJda Acetic Acid (sirka kislotasi), Vinyl Acetate Monomer (VAM — vinilasetat monomeri) hamda PVAM ishlab chiqarishni yo‘lga qo‘yish bo‘yicha istiqbolli loyihalar muhokama qilinib, mazkur yo‘nalishlarda hamkorlikni rivojlantirish yuzasidan kelishuvga erishildi.

    Ushbu loyihalarni amalga oshirish mahalliy kimyo sanoatining mahsulot turlarini kengaytirish, yuqori qo‘shilgan qiymatga ega kimyoviy mahsulotlar ishlab chiqarishni o‘zlashtirish, import o‘rnini bosuvchi mahsulotlar hajmini oshirish hamda eksport salohiyatini mustahkamlashga xizmat qilishi kutilmoqda. Shuningdek, hamkorlik doirasida ilg‘or zamonaviy yechimlarni joriy etish, texnologik litsenziyalar va muhandislik xizmatlaridan foydalanish, ishlab chiqarishning texnik-iqtisodiy ko‘rsatkichlarini baholash hamda loyihalarni amalga oshirishning keyingi bosqichlari xususida o‘zaro fikr almashildi.