Previous Next

Jamiyatning o‘quv markazida muhandis-texnik xodimlar uchun amaliy o‘quv seminari tashkil etildi. Unda kimyoviy texnologiya asoslari, mahsulot ishlab chiqarish jarayonlari, fuqaro muhofazasi va favqulodda holatlarda to‘g‘ri harakatlanish, ESG va barqaror rivojlanish tamoyillari, mehnat qonunchiligi, sanoat hamda mehnat xavfsizligi kabi muhim yo‘nalishlarda mashg‘ulotlar o‘tkazildi.

Darslar tegishli sohalar bo‘yicha malakali mutaxassislar va mas’ul xodimlar tomonidan olib borilib, tinglovchilarga ishlab chiqarish jarayonlarining o‘ziga xos jihatlari, texnologik talablarga rioya qilish, xavf-xatarlarni oldindan baholash va ularning oldini olish bo‘yicha batafsil ma’lumot berildi. Fuqaro muhofazasi yo‘nalishida esa favqulodda vaziyatlar yuzaga kelganda tezkor va to‘g‘ri harakat qilish, xodimlarni xavfsiz hududga evakuatsiya qilish, belgilangan harakat algoritmlariga amal qilish, o‘zaro hamjihatlikda ish olib borish bo‘yicha ko‘nikmalar mustahkamlandi.

Seminarda bugungi kunda jahon miqyosida dolzarb ahamiyat kasb etayotgan ESG va barqaror rivojlanish tamoyillariga ham alohida e’tibor qaratildi. Atrof-muhitni muhofaza qilish, tabiiy resurslardan oqilona foydalanish, ijtimoiy mas’uliyatni kuchaytirish va samarali korporativ boshqaruvni yo‘lga qo‘yish zamonaviy ishlab chiqarishning muhim talablaridan biri ekani qayd etildi.

Mehnat qonunchiligi bo‘yicha mashg‘ulotlarda esa xodimlarning huquq va majburiyatlari, mehnat intizomi, ish beruvchi va xodim o‘rtasidagi munosabatlarni qonuniy asosda tashkil etish hamda mehnat muhofazasiga doir muhim normalar yuzasidan tushuntirishlar berildi. Bunday seminarlar muhandis-texnik xodimlarning kasbiy bilim va ko‘nikmalarini muntazam ravishda oshirish, zamonaviy ishlab chiqarish talablarini chuqur o‘zlashtirish, xavfsizlik madaniyatini yanada yuksaltirish hamda mas’uliyatli yondashuvni mustahkamlashga xizmat qiladi.