Касбини юракдан севган инсоннинг ҳар бир қадами – ватан равнақига қўшилган туҳфадир. Бундай инсонлар фақат меҳнати билан эмас, балки ўзининг билими, садоқати ва фидоийлиги билан жамиятга хизмат қилади. “Навоийазот” акциядорлик жамиятининг 918-Аммиак ишлаб чиқариш цехида катта смена устаси лавозимида фаолият олиб бораётган, техник фанлар бўйича фалсафа доктори (PhD) Аброр Аслонов ҳақида ҳам шундай дейиш мумкин.

Аброр 8 йилдан буён республика кимё саноатида етакчи саналган “Navoiyazot” АЖнинг энг муҳим тармоқларидан бири – Аммиак ишлаб чиқариш цехида ишлаётган бўлса, 2024 йилдан катта смена устаси сифатида фаолият юритмоқда.

У фаолият юритадиган 918-цех замонавий технологиялар билан жиҳозланган, юқори босим ва ҳароратда ишлайдиган мажмуа бўлиб, йилига юз минглаб тонна маҳсулот ишлаб чиқаради. Суюқ аммиак ва карбамид ишлаб чиқариш ҳажми 2024 йилда мос равишда 671 минг 739 тонна ва 579 минг 919 тоннага етди. Бу кўрсаткичлар нафақат иқтисодий, балки стратегик аҳамиятга ҳам эга.

Бугун “Навоийазот”АЖ 70 дан ортиқ турдаги маҳсулотларини дунё бозорига чиқариб, сўнгги уч йилда 15 дан зиёд давлатга 328 миллион долларлик экспортни амалга оширди. Бу жараёнларда Аброр Аслонов ва унинг жамоасининг ҳиссаси беқиёс. У фаолият олиб бораётган цехда “Mitsubishi Heavy Industries” компанияси талаблари асосида ишлаб чиқариш мунтазам таъминлаб келинмоқда.

Бу инсоннинг яна бир ўзига хос жиҳати шундаки, у саноатдаги тажрибасини назария билан уйғунлаштира олган мутахассисдир. У “Қорақалпоғистон Республикаси Зиналбулак талк-магнезит минерали асосида комплекс таъсир этувчи магний хлорат дефолианти олиш технологияси” мавзусида илмий изланиш олиб борган ва муваффақиятли ҳимоя қилган. Унинг ушбу тадқиқоти қишлоқ хўжалиги ва саноат учун амалда фойда келтира оладиган илмий янгилик ҳисобланади.

Бу дегани, у фақат ишчи эмас – муҳандис, олим, тадқиқотчи ва айни пайтда ўз шогирдларига билим улашувчи устоздир. Унинг 14 та илмий мақоласи, улардан 6 таси халқаро ва республика журналларида эълон қилингани, бу инсоннинг илмий салоҳиятидан далолат беради.

Аброр Аслонов ибратли оила бошлиғи, ҳалол ва камтарин инсон. Унинг меҳнатга бўлган садоқати, шогирдларга бўлган эътибори уни нафақат яхши мутахассис, балки устоз сифатида ҳам намоён этмоқда. 

Унинг ҳаёт йўли бир қарашда оддий – иш, илм, тартиб, масъулият. Лекин айнан мана шу “оддий” кўринган фаолият ортида тинимсиз меҳнат, изланиш ва Ватанга муҳаббат мужассам.

Аброрнинг самарали фаолияти, юқори касбий малакаси ва юксак инсоний фазилатлари юксак давлат мукофотига муносиб номзодга айлантирди. Жорий йил 30 июнь – Ёшлар куни арафасида Президент фармонига кўра, у “Келажак бунёдкори” медали билан тақдирланди. 

А.Бўриев, ЎзА мухбири