BAYRAMGA MUNOSIB TUHFA

Asosiy > Yangiliklar > BAYRAMGA MUNOSIB TUHFA

BAYRAMGA MUNOSIB TUHFA

Istiqlol shodiyonalari yangi o‘quv yiliga ulanib ketadi. Eng ulug‘ va eng aziz bayramga hamohang tarzda umumta’lim maktablarida birinchi qo‘ng‘iroqning yangrashi o‘quvchilarning yangi bilimlarini egallashga debocha sanaladi. “Navoiyazot” AJda mehnat qilayotgan 36 nafar xodimlarning farzandlariga korxona tomonidan o‘quv qurollari jamlanmasining sovg‘a qilinishi yoshlar uchun bayram sovg‘asi bo‘ldi.

Tadbir avvalida jamiyat boshqaruvi raisi Farrux Samadov yig‘ilganlarni mustaqillikning 35 yilligi hamda boshlanishi kutilayotgan yangi o‘quv yili bilan muborakbod etdi. Yigit-qizlarning o‘quv dargohida puxta bilim olishi, kelajakda yurtimiz ravnaqiga munosib hissa qo‘shadigan komil insonlar safida bo‘lishiga ishonch bildirildi.

Maktab sumkasi, o‘quv qurollarining topshirilishi korxonada xodimlarni moddiy jihatdan qo‘llab-quvvatlashga qaratilgan e’tibor, jamiyat rivoji yo‘lida qilingan mehnatning qadrli ekanligidan dalolat beradi. Tadbirda bolalarning Vatanni ulug‘lovchi, istiqlolni madh etuvchi she’rlarni aytishi barchaga bayram kayfiyatini ulashdi, yosh avlodni yangi maqsadlar sari ruhlantirdi.