Previous Next

Korxonada jamiyat yoshlari, xodimlari ishtirokida “Giyohvandlik, uning huquqiy hamda tibbiy oqibatlari” mavzusida davra suhbati tashkil etildi. Dastlab yig‘ilganlar e’tiboriga psixotrop va giyohvand moddalar tarqalishining oldini olishga qaratilgan “Drug Dealer ko‘zni ochish vaqti keldi” nomli insta serial namoyish etildi. Tadbirda viloyat IIB mas’ul xodimlari, O‘zbekiston yoshlar ittifoqi Navoiy viloyati Kengashi vakillari, viloyat Narkologiya markazi mutaxassisi ishtirok etdi.

Uchrashuvda giyohvandlik va psixotrop moddalar iste’molining inson salomatligi, oila va jamiyat hayotiga salbiy ta’siri, shuningdek, mazkur illat bilan bog‘liq huquqbuzarliklar uchun qonunchilikda belgilangan javobgarlik choralari haqida batafsil ma’lumot berildi. Mutaxassislar tomonidan giyohvandlikning oldini olish, yoshlar o‘rtasida sog‘lom turmush tarzini targ‘ib etish, ularning huquqiy va tibbiy savodxonligini oshirish, zararli odatlarga nisbatan murosasiz munosabatni shakllantirish masalalariga alohida e’tibor qaratildi.

Ta’kidlanganidek, giyohvandlikka qarshi kurashish nafaqat huquqni muhofaza qiluvchi va tibbiyot muassasalarining, balki har bir fuqaroning mas’uliyati hisoblanadi. Shu bois korxonada xodimlar, ayniqsa, yoshlar o‘rtasida sog‘lom ma’naviy muhitni shakllantirish hamda turli salbiy illatlarning oldini olishga qaratilgan profilaktik tadbirlarni izchil davom ettirish lozimligi qayd etildi. Shuningdek, kiberfiribgarlar tuzog‘iga tushmaslik bo‘yicha ma’lumot berilib, targ‘ibot materiallari tarqatildi.