Previous Next

McKinsey xalqaro boshqaruv konsalting kompaniyasi vakillari “Navoiyazot” AJda bo‘lishdi. Yirik korxonalar uchun biznes strategiyasini ishlab chiqish, boshqaruvni takomillashtirish, xarajatlarni kamaytirish va iqtisodiy samaradorlikni oshirish bo‘yicha malakali mutaxassislarga ega kompaniya a’zolari korxona mutasaddilari hamda mas’ul xodimlari bilan uchrashdilar.

Muloqot davomida korxonaning 2030–2035 yillargacha bo‘lgan davrdagi asosiy strategik ustuvor yo‘nalishlari va rivojlanish rejalari, qo‘shilgan qiymati yuqori bo‘lgan kimyoviy mahsulotlar ishlab chiqarish, mehnat unumdorligini oshirish, uskunalar va butlovchi qismlarni mahalliylashtirish darajasini yaxshilash singari masalalar muhokama etildi.

Shuningdek, yangi loyihalarni amalga oshirish, mavjud ishlab chiqarish majmualarini modernizatsiya qilish va amaldagi quvvatlarni saqlab qolish hamda ularni qo‘llab-quvvatlash uchun investitsiyalarni jalb etish bo‘yicha o‘zaro fikr almashildi.

Tomonlar o‘zaro manfaatli hamkorlikni izchil davom ettirish, belgilangan ustuvor vazifalarni amalga oshirish yuzasidan amaliy takliflarni ishlab chiqish hamda korxonaning uzoq muddatli barqaror rivojlanishini ta’minlashga qaratilgan tashabbuslarni qo‘llab-quvvatlash muhimligini ta’kidladilar.