Previous Next

    Korxonaning o‘quv markazida mexaniklar, ishlab chiqarish-texnik byuro muhandislari hamda ta’mirlash bo‘yicha ustalar uchun kasbiy bilim va amaliy ko‘nikmalarni yanada mustahkamlashga qaratilgan o‘quv kursi tashkil etildi.

    O‘quv mashg‘ulotlarining asosiy maqsadi — mutaxassislarning texnologik va texnik jarayonlarni zamonaviy talablar asosida tashkil etish, uskunalardan xavfsiz va samarali foydalanish, ularning texnik holatini to‘g‘ri baholash hamda ta’mirlash ishlarini sifatli amalga oshirish bo‘yicha bilim va malakasini oshirishdan iborat.

    Kursning nazariy qismida yuk ko‘tarish kranlari va mexanizmlarining tuzilishi, ulardan foydalanishga qo‘yiladigan talablar, texnik ko‘rikdan o‘tkazish tartibi hamda xavfsiz ekspluatatsiya qilish qoidalari batafsil yoritildi. Shuningdek, bug‘ va issiq suv qozonlarining ishlash prinsipi, ularga texnik xizmat ko‘rsatish talablari, korxonaning sanoat binolari va inshootlarini texnik jihatdan soz holatda saqlash masalalari bo‘yicha zarur bilimlar berildi.

    Mashg‘ulotlar davomida kompressor va nasoslarni ta’mirlashning asosiy jihatlari, texnik xizmat ko‘rsatish jarayonida e’tibor qaratilishi lozim bo‘lgan omillar, shuningdek, loyihalash va ta’mirlash jarayonlarida foydalaniladigan chizmalarni o‘qish hamda ularga qo‘yiladigan texnik talablar bo‘yicha ham nazariy tushunchalar mustahkamlandi.

    Amaliy mashg‘ulotlarda esa nazariy bilimlarning bevosita ishlab chiqarish jarayonida qo‘llanilishiga alohida e’tibor qaratildi. Ishtirokchilar korxona hududida o‘rnatilgan yuk ko‘tarish kranlari va mexanizmlarining asosiy qismlari bilan yaqindan tanishib, ularni texnik ko‘rikdan o‘tkazish, aniqlangan nosozliklarni baholash hamda uskunalarni ishga tayyor holatga keltirish bo‘yicha amaliy topshiriqlarni bajardilar.

    Jumladan, kran va mexanizmlarning tormoz tizimi, ilgaklari, po‘lat arqonlari, yuk ko‘tarish moslamalari hamda boshqaruv tizimlarining texnik holatini tekshirish, ularning xavfsiz ishlashini ta’minlash bo‘yicha amaliy ko‘nikmalar baholandi. Mutaxassislarning uskunalardagi ehtimoliy nosozliklarni o‘z vaqtida aniqlash, ularning oldini olish va texnik xizmat ko‘rsatish ishlarini belgilangan talablar asosida tashkil etish bo‘yicha bilimlari sinovdan o‘tkazildi.

    Amaliy va nazariy mashg‘ulotlarning uyg‘unligi mutaxassislarning kasbiy kompetensiyasini oshirish, ishlab chiqarish uskunalarining ishonchli va xavfsiz ishlashini ta’minlash, ta’mirlash ishlarining sifatini yaxshilash hamda mehnat unumdorligini yuksaltirishga xizmat qiladi.

    Bunday o‘quv kurslari korxonada malakali kadrlar salohiyatini mustahkamlash, ishlab chiqarish jarayonlarida xavfsizlik va texnik intizomni ta’minlash hamda uskunalardan samarali foydalanishning muhim omillaridan biridir.