Previous Next

Korxonada Xitoyning “Hangyang Group” kompaniyasi mutaxassislari, “Navoiyuran” DK, “O‘zkimyosanoatloyiha” AJ vakillari ishtirokida uchrashuv tashkil etildi. Unda “Navoiyuran” DK negizida qurilishi rejalashtirilayotgan suyuq uglerod dioksidi (CO₂) ishlab chiqarish majmuasiga texnik jihatdan mos bo‘lgan uskunalarni tanlashga qaratilgan muzokaralar o‘tkazildi.

Loyihaga muvofiq, yiliga 100 ming tonna texnik CO₂ ishlab chiqarish rejalashtirilgan bo‘lib, istiqbolda ushbu quvvatni 200 ming tonnagacha oshirish imkoniyati mavjud.

Majmuaning dastlabki qiymati 17 mln. AQSh dollarini tashkil etadi va uni 2026–2027 yillarda amalga oshirish ko‘zda tutilgan. Uchrashuvda texnologik yechimlar, ishlab chiqarish jarayoni uchun zarur asosiy uskunalarning texnik parametrlari, ularning samaradorligi va mavjud muhandislik infratuzilmasiga integratsiya qilish imkoniyatlari atroflicha muhokama qilindi.

Xususan, uglerod dioksidini aralashmalardan tozalash, kompressiya qilish va suyultirish orqali tayyor suyuq CO₂ mahsulotini olish jarayoni uchun zamonaviy va energiya tejamkor texnologiyalarni tanlash masalalariga alohida e’tibor qaratildi. Tomonlar uskunalarning texnik imkoniyatlari, ishonchliligi, ekspluatatsiya talablari hamda loyihani amalga oshirishdagi muhandislik yechimlari bo‘yicha fikr almashdilar.

Mazkur loyihaning amalga oshirilishi texnologik jarayonlarda hosil bo‘ladigan uglerod dioksidini qayta ishlab, yuqori qo‘shimcha qiymatga ega tovar mahsulotiga aylantirish, mavjud resurslardan samarali foydalanish hamda sanoat korxonalari o‘rtasida kooperatsiya aloqalarini yanada rivojlantirish imkonini beradi.