Previous Next

Polshaning ANWIL S.A. kompaniyasi vakillari “Navoiyazot” AJda bo‘lishdi. Mamlakatning yirik kimyo sanoati korxonasi azotli mineral o‘g‘itlar, ammiak, azot kislotasi, PVX, kaustik soda, xlor va boshqa bir qator mahsulotlarni ishlab chiqaradi. Xorijlik mutaxassislar jamiyatdagi ishlab chiqarish quvvatlari faoliyati bilan yaqindan tanishdilar.

Mehmonlarga majmualarda amalga oshirilayotgan modernizatsiya ishlari, texnologik jarayonlar, mahsulot sifatini yaxshilash bo‘yicha qo‘llanilayotgan zamonaviy yechimlar haqida batafsil ma’lumot berildi. Tomonlar kimyo sanoatidagi ilg‘or texnologiyalarni joriy etish, tajriba almashish, ishlab chiqarish samaradorligi, mutaxassislar malakasini oshirish hamda istiqbolli investitsiya va kooperatsiya loyihalarini amalga oshirish masalalari yuzasidan fikr almashdilar.

Chet ellik mutaxassislar “Navoiyazot” AJning ishlab chiqarish salohiyati, zamonaviy infratuzilmasi va korxonada tashkil etilgan texnologik jarayonlarga yuqori baho berib, bunday tashriflar o‘zaro manfaatli hamkorlikni yanada rivojlantirish uchun muhim asos bo‘lib xizmat qilishini ta’kidlashdi.

Korxonalar o‘rtasidagi yaqin hamkorlik Yevropa texnologiyalari va nou-xaularini joriy etish, energiya va resurs tejamkorligiga erishish, mahsulot turlarini kengaytirish, eksport salohiyatini kuchaytirish, mutaxassislar malakasini oshirish, ekologik va ESG talablariga mos ishlab chiqarishni rivojlantirishda muhim o‘ringa ega.