Previous Next

   Samarqanddagi C5+1 formatidagi tadbirlar doirasida “Navoiyazot” AJ mutasaddilari “Honeywell Industrial Automation” MChJ QK prezidenti George Bou Mitri bilan ammiak va karbamid ishlab chiqarish texnologik jarayonini kengaytirilgan boshqarish tizimini (APC / SUUTP) joriy yuzasidan muzokaralar olib borishdi. Muloqotda 2026-2028-yillarda amalga oshirilishi rejalashtirilayotgan loyihadan kutilayotgan iqtisodiy va moliyaviy samaradorlik masalalari yuzasidan o‘zaro fikr almashildi.

   Uchrashuvda mahsulot ishlab chiqarish jarayonida ilg‘or avtomatlashtirish yechimlarini qo‘llash, texnologik parametrlarni optimal boshqarish hamda ishlab chiqarish samaradorligini oshirish imkoniyatlariga alohida e’tibor qaratildi. Shuningdek, kengaytirilgan boshqaruv tizimini joriy etish orqali texnologik jarayonlar barqarorligini ta’minlash, xomashyo va energetik resurslar sarfini kamaytirish, mahsulot ishlab chiqarish hajmini oshirish hamda sifatini yaxshilash masalalari muhokama qilindi.

   Tomonlar loyihani amalga oshirishning texnik va tashkiliy jihatlarini batafsil o‘rganish, iqtisodiy samaradorlik ko‘rsatkichlarini baholash va hamkorlikning keyingi bosqichlarini belgilash bo‘yicha fikr almashdilar. Mazkur tashabbus “Navoiyazot” AJda ishlab chiqarish jarayonlarini raqamlashtirish, zamonaviy boshqaruv texnologiyalarini joriy etish va korxonaning raqobatbardoshligini oshirishga qaratilgan muhim qadamlardan biri hisoblanadi.