Previous Next

«Navoiyazot» AJda ishlab chiqarish infratuzilmasini yanada takomillashtirish, transport xizmatlari sifatini oshirish, texnologik va xo‘jalik jarayonlarining uzluksiz hamda samarali tashkil etilishini ta’minlashga qaratilgan tizimli ishlar amalga oshirilmoqda.

Jamiyatning moddiy-texnik bazasini mustahkamlash, avtotransport vositalarini bosqichma-bosqich yangilash, mavjud texnikalarga tushadigan yuklamani kamaytirish, vaqt va yoqilg‘i resurslaridan oqilona foydalanish, shuningdek, ishchi-xodimlar uchun yanada qulay va xavfsiz mehnat sharoitlarini yaratish maqsadida umumiy qiymati 16 milliard 3 million 800 ming so‘m bo‘lgan zamonaviy maxsus va yuk avtotransport vositalari xarid qilindi.
Xususan, jamiyat ehtiyoji uchun yuk ko‘tarishi 25 tonna bo‘lgan 2 ta o‘zi ag‘dargich, 10 tonnali 2 ta tentli yuk transport vositasi, ko‘tarish balandligi 22 metrni tashkil etadigan 2 ta teleskopik ko‘targich, 2 ta maxsus jihozlangan yong‘in o‘chirish avtomobili hamda sig‘imi 7,4 kub metr bo‘lgan 1 ta yuvish va tozalash ishlariga mo‘ljallangan maxsus avtotransport vositasi sotib olindi. 

Mazkur maxsus texnikalar jamiyatning ishlab chiqarish bo‘linmalarida yuk tashish, ta’mirlash va montaj ishlarini amalga oshirish, balandlikdagi texnik vazifalarni xavfsiz bajarish, hududlarni sanitar tozalash va obodonlashtirish, shuningdek, yong‘in xavfsizligini ta’minlash imkoniyatlarini yanada kengaytiradi.
Yangi avlod transport vositalaridan foydalanish ish jarayonlarini tezkor tashkil etish, xarajatlarini maqbullashtirish, texnikalarning ekspluatatsion samaradorligini oshirish va ishlab chiqarish jarayonlaridagi ehtimoliy to‘xtalishlarni kamaytirishga xizmat qiladi.

Ayniqsa, yirik sanoat korxonasi sharoitida ishlab chiqarish obyektlari o‘rtasidagi logistika, maxsus texnikaga bo‘lgan kundalik ehtiyoj va texnologik jarayonlarning uzluksizligi transport infratuzilmasining ishonchli va zamonaviy bo‘lishini talab etadi. Bugungi kunda jamiyat hududida amalga oshirilayotgan keng ko‘lamli bunyodkorlik ishlarining sifatli bajarilishida ham transport vositalarini yangilash jamiyat ishlab chiqarish salohiyatini mustahkamlashga qaratilgan muhim amaliy choralardan biri hisoblanadi.

«Navoiyazot» AJda asosiy va yordamchi ishlab chiqarish infratuzilmasini modernizasiya qilish, transport sexidagi imkoniyatlarni zamonaviy talablar asosida yaхshilab borish hamda resurslardan samarali foydalanishga qaratilgan ishlar izchil davom ettirilmoqda.