HAR BIR TAHLIL ORTIDA — MAS’ULIYAT

Asosiy > Bizning Faxrimiz > HAR BIR TAHLIL ORTIDA — MAS’ULIYAT

HAR BIR TAHLIL ORTIDA — MAS’ULIYAT

Umida Safarova 2010-yilda korxonadagi mehnat faoliyatini laborant sifatida boshlagan. O‘sha paytda ish jarayonidagi har bir tahlil, har bir raqam va natija uning uchun yangi tajriba edi. Yillar davomida orttirilgan bilim, amaliy ko‘nikma va kasbiga bo‘lgan qiziqish esa uni tajribali mutaxassis sifatida shakllantirdi.

Bugun kasb fidoyisi 18-sex kimyogari sifatida faoliyat yuritmoqda. Uning kundalik ishi aniqlik va mas’uliyatni talab qiladi. Chunki kimyogarning har bir tahlili ortida ishlab chiqarish jarayonining belgilangan talablar asosida olib borilishi, natijalarning ishonchliligi va sifat nazorati turadi.

Laborantlikdan kimyogarlikkacha bo‘lgan mehnat yo‘li Umida uchun shunchaki lavozim o‘zgarishi emas. Bu — izlanish, o‘rganish va tajriba to‘plash bilan o‘tgan yillar samarasidir. U o‘z kasbining nozik jihatlarini puxta egallab, har bir vazifaga jiddiy va mas’uliyat bilan yondashishni mehnat faoliyatining asosiy mezoni deb biladi.