Previous Next

Korxonaning faollar zalida ishlab chiqarish majmualari, sex, boshqarma, bo‘lim, xizmat boshliqlari ishtirokida bir qator muhim masalalar muhokamasiga bag‘ishlangan yig‘ilish bo‘lib o‘tdi. Unda dastlab viloyat statistika boshqarmasi mutaxassisi tomonidan joriy yilning 15-yanvaridan boshlanadigan aholi va qishloq xoʻjaligini roʻyxatga olish tadbiri xususida so‘z yuritildi.

Onlayn ro‘yxatdan o‘tish tartibi, so‘rovnomadagi savollarga javob berishda nimalarga e’tibor qaratish zarurligi,  mazkur jarayonning mamlakatni ijtimoiy-iqtisodiy rivojlantirishdagi ahamiyati, mutasaddilar oldida turgan muhim vazifalarga e’tibor qaratildi. Mavzuga oid savollarga mutaxassis tomonidan javob berildi.

Yig‘ilish kun tartibidagi navbatdagi masalada jamiyat hududida qurilish-ta’mirlash ishlari yakunlangandan so‘ng inshootlar, texnologik jihozlar, uskunalarni ishlatishga qabul qilish jarayonlarini belgilangan tartibda, amaldagi me’yoriy-huquqiy hujjatlar va texnika xavfsizligi talablariga qat’iy rioya qilgan holda amalga oshirish bo‘yicha belgilangan vazifalar ijrosini ta'minlash masalasi e'tibor markazida bo‘ldi. 

Shuningdek, “Navoiyazot” AJ xodimlarining o‘z vazifasini bajarishi jarayonida yuzaga kelishi mumkin bo‘lgan manfaatlar to‘qnashuvi holatlarini aniqlash va hal etishga qaratilgan yillik deklaratsiyani to‘ldirish bo‘yicha ko‘rsatmalar berildi.