Previous Next

Bugun Qozog‘istonning Ostona shahridagi “EXPO” xalqaro koʻrgazmalar markazida Mintaqaviy ekologik sammit boshlandi. Ushbu tadbir Markaziy Osiyo davlatlari va xalqaro tashkilotlarni birlashtirib, ekologik muammolar va barqaror rivojlanish masalalarini muhokama qilishga qaratilgan.

MES-2026 diqqat markazida ekologik siyosatga kompleks yondashuvni aks ettiruvchi sakkizta ustuvor yoʻnalish turibdi: iqlim oʻzgarishiga qarshi kurashish, oziq-ovqat xavfsizligi va ekotizimlar barqarorligini taʼminlash, tabiiy xavf-xatarlarga moslashish va iqtisodiy barqarorlikni oshirish, havo ifloslanishini kamaytirish va chiqindilarni samarali boshqarish, ekologik maqsadlarga erishish mexanizmlarini rivojlantirish, tabiiy resurslarni barqaror boshqarish, adolatli va inklyuziv “yashil” oʻtish, ekologik hamda raqamli kompetensiyalarni rivojlantirish. Sammit kun tartibi barqaror rivojlanishning ekologik hamda ijtimoiy-iqtisodiy jihatlarini ham qamrab olgan.

Oʻzbekiston pavilyoni mamlakatimizning ekologiya, iqlim oʻzgarishi va Markaziy Osiyoning barqaror rivojlanishi sohalaridagi davlat siyosatining ustuvor yoʻnalishlarini aks ettiradi.Tadbirda “Navoiyazot” AJ vakillari ham ishtirok etishmoqda. 

Sammit doirasida zamonaviy, kam chiqindili va energiya tejovchi texnologiyalar bilan tanishish imkoniyati yaratilаdi. Qolaversa, tadbir xalqaro kompaniyalar va tashkilotlar bilan yangi loyihalar boʻyicha fikr almashish, mintaqadagi boshqa sanoat korxonalarining ekologik boshqaruv boʻyicha ilgʻor tajribalarni muhokama qilishga xizmat qiladi.