Previous Next

O‘zbek tili bayrami kuni hamda O‘zbek tiliga davlat tili maqomi berilganligining 37 yilligi munosabati bilan Navoiy shahridagi Alisher Navoiy haykali poyida tantanali tadbir tashkil etildi. Unda viloyat hokimligi mutasaddilari, korxona, tashkilot, muassasalar vakillari, nuroniylar, yoshlar, keng jamoatchilik vakillari qatnashdilar.

Davlat tiliga bo‘lgan ehtirom ajdodlar merosiga hurmat, milliy qadriyat va an’analarga sadoqat timsolidir. Tadbir davomida o‘zbek tilining xalqimiz hayotidagi o‘rni va ahamiyati, uning davlat tili sifatidagi nufuzini yanada oshirish, boy tarixiy va ma’naviy merosimizni asrab-avaylash borasida amalga oshirilayotgan ishlar xususida so‘z yuritildi. Ta’kidlanganidek, ona tilimiz milliy o‘zligimiz, ma’naviyatimiz va birligimizning mustahkam poydevori hisoblanadi.
Shuningdek, buyuk mutafakkir va shoir Alisher Navoiyning o‘zbek tili ravnaqi yo‘lidagi beqiyos xizmatlari alohida e’tirof etildi. Ulug‘ shoirning boy adabiy merosi ona tilimizning naqadar boy, jozibador va badiiy imkoniyatlarga ega ekanini namoyon etishi qayd etildi.

"Navoiyazot" AJ vakillari ham faol ishtirok etgan tadbirda buyuk ajdodimiz poyiga qo‘yilgan gulchambarlar yosh avlodni ona tiliga hurmat ruhida tarbiyalash, ularning nutq madaniyati va savodxonligini oshirish, davlat tilining jamiyat hayotidagi mavqeini mustahkamlash yo‘lidagi ezgu intilish ifodasiga aylandi. Zero, yigit-qizlarga ibrat bo‘layotgan bunday namuna azaliy an’analarning bardavomligiga xizmat qiladi.